:::
線上收聽
談古論今話當前 週四 22:00-22:59

週一至週五1100、1300、1500、1700、1900講客三分鐘新聞

播出時間: 2022-11-22 17:00 講客電臺節目組 2022-11-22 : 下午17點新聞

2022-11-22 : 下午17點新聞

機車駕訓按算增加道路實際訓練 推算112年試辦

針對奧多拜考駕駛牌按算增加路考方面,交通部長王國材今晡日講,會先朝奧多拜駕訓班有實際个道路訓練開始先做,推算明年就做得開始試辦。

交通部今晡日舉辦「111年度路先生頒獎授證典禮」,交通部長王國材在典禮過後,接受媒體聯訪該時表示,奧多拜路考分做2隻階段,第1階段係駕訓方面會有部分補助,希望增加實際道路訓練;第2階段係按算未來考駕駛牌部分增加路考,但係實際執行方面還係有困難个位所,愛仰般執行還愛再過參詳。

公路總局副局長張舜清補充,目前推算明年試辦駕訓班道路實際訓練,會先在全台灣北、中、南各地都選擇適當个駕訓班來進行試辦,還過還愛選擇適當路線摎訓練方式,目前還在該規劃當中。

索羅門7.0地動海嘯警報解除 地動尾緊來暫時無人傷亡

太平洋國家索羅門群島今晡日發生規模7.0地動,首都荷尼阿拉民眾感受著強烈个地動,目前無傳出有人傷亡,海嘯威脅大概解除,但係氣象局還係提醒民眾細義地動尾。

根據米國地質調查所(US Geological Survey)資料,這擺地動係當地時間下晝1點過後發生,震源深度15公里,震央位在索羅門群島沿海西南方18公里个位所。

米國世界腳球賽人氣升溫 舊金山球迷期待下一屆主場看比賽

2022卡達世界盃足球賽開踢,4年前無緣世界腳球比賽个米國今年捲土重來,球員陣容較後生。民調顯示,米國球迷對腳球熱情升溫。舊金山市區在11/21開始,連續10日舉行戶外轉播,收假隔日个第一場比賽餳著將近成千儕人到現場看比賽。

主辦這擺戶外轉播个舊金山娛樂摎公園部(San Francisco Recreation and Park Department)个總經理金斯柏格(Phil Ginsburg)表示,腳球係罕得看著做得摎全世界个人聚共下个運動比賽,希望2026年世界盃,乜做得分全世界球迷感受著舊金山多元開放个價值。