:::
線上收聽
SeOer个耳空wonderland 周一至周五 21:00-21:15

週一至週五1100、1300、1500、1700、1900講客三分鐘新聞

播出時間: 2022-09-19 15:00 講客電臺節目組 2022-09-19:下午15點新聞

2022-09-19:下午15點新聞

發琢呆比賽相隔3年重新在韓國漢江舉辦 疫情之下尋轉心靈恬靜
識因為歌手Crush得著優勝引發話題个韓國發琢呆比賽,在疫情之下相隔3年恁久个時間重新在漢江舉行,今年報名參加人數高達4000零儕,比頭過多加還較多人,最尾以80比1个競爭率選出50組人馬,相爭「發琢呆大王」个位仔,盡多人表示希望藉等這擺比賽、減輕疫情之下累積个壓力。

2016年起勢在漢江舉行个發琢呆比賽,受著COVID-19疫情影響、相隔3年恁久重新轉到橫跨漢江个潛水橋,原旦定在9月11舉行个比賽,因為風搓个影響挷後到9月18下晝頭舉辦,迎接參賽者佢兜个係出日頭个好天時。

2014年開始舉辦發琢呆比賽个藝術家Woopsyang表示,報名期間會詢問參賽者个報名原因,頭過盡多人係因為想愛在無閒直掣个生活當中暫時歇睏一下仔,這擺比賽有當多人表示在疫情之下累積咧盡多新个壓力,希望藉等比賽摎壓力做盡攉忒。

舉辦發琢呆比賽个佢也識分人疑狐:「做麼个連發琢呆都愛競爭?」佢解釋,韓國社會頭過對發琢呆个看法並毋好,「𠊎兜輒常分先生、爺哀責備講『毋好發琢呆』」,「恁樣形假使想愛大自家共下發琢呆該愛仰般做呢,既然大家恁好競爭,若講變做比賽,大自家係毋係就會試著這係有價值个事情咧」。

Woopsyang佢從激烈个社會競爭當中尋著靈感,「𠊎兜做得透過比賽,摎原旦當像無價值个事情,『詐意』變做有價值」,但係佢也強調,發琢呆比賽並毋係正經係為著競爭,係愛「像競爭共樣認真進行」。佢講,發琢呆比賽開辦以來,做得感受著社會對發琢呆个看法變成還較正面,甚至有盡多爺哀會渡等細人仔共下參加。

台東強震 富里、玉里、關山个貯米冷藏桶轉忒
這幾日花東所在緊發生地動,農委會今晡日表示,金簪花花季摎金簪花个產銷、還過柑仔山柑橘个栽種都無麼个影響,較受著影響个係花蓮縣富里鄉、玉里鎮、台東縣關山鎮一帶个貯米冷藏桶轉忒,數量還在該盤點當中,會想辦法徙到附近其他做得貯存个位所保存,正好分續下來挨礱這兜加工作業進行下去,道路這幾日也正在該搶修,對產銷無麼个影響。