:::
線上收聽
一週國際 週一 21:15-22:00

週一至週五1100、1300、1500、1700、1900講客三分鐘新聞

播出時間: 2022-06-09 15:00 講客電臺節目組 2022-06-09:下午15點新聞

2022-06-09:下午15點新聞

泰國大麻合法化 民眾醫療用途栽種數量無設限制
泰國政府在2019年修改麻醉品法(Narcotics Act),分泰國成為東南亞第一隻合法化醫療用大麻个國家,雖然醫療用大麻合法,毋過大麻還係分政府列為毒品管制名單當中个第五級管制毒品。但係這下泰國政府今年進一步摎大麻從毒品管制名單當中移除,相關法令今晡日生效。

今晡日起勢、泰國民眾做得無限制數量在自家屋下種大麻,但係單淨限制家戶醫療用途,做毋得用在娛樂頂項。

避免增加學生仔遰病風險 南投遠距教學再過延長1隻禮拜
台中市今晡日宣布,高中以下學校6月13到17暫停實體課程,採取線上遠距教學,後續係毋係恢復實體上課,會看疫情狀況做滾動式檢討;南投縣政府指出,為着避免增加學生仔遰病風險,對6月13到17,高中以下學校也暫停實體課程。

另外,彰化縣長王惠美接受媒體聯訪該下講,係毋係開放實體課程摎學生仔个康健有關,韶早會摎確診數字做通盤檢視,正摎大家公布係毋係跈進暫停實體課程。

嘉義縣山區落石造成樹仔橫忒阻礙交通 搶修恢復通行
連續3日个梅雨造成嘉義縣山區道路幾下隻位所,有石牯跌下來、樹仔橫忒,阻礙交通,嘉義縣政府表示,當晝以前已經全部搶修好、恢復通行,呼籲用路人經過容易發生天災个路段,請停下來、看一下摎聽清楚、確定安全過後,再過駛車仔過去。

這擺發生災害位所包括阿里山鄉169線28公里該位,係大石牯跌下來敲着路面,造成道路摎護欄面壞忒;梅山鄉162甲縣道8公里該位,向太平方向个路樹橫忒;152縣道2.2公里該位,有路樹橫忒、矺着電信線路這兜。

呼籲駛車仔个鄉親,經過山區容易發生天然災害个路段,愛多加注意路項个狀況。