:::
線上收聽
SeOer个耳空wonderland 周一至周五 21:00-21:15

週一至週五1100、1300、1500、1700、1900講客三分鐘新聞

播出時間: 2022-06-06 15:00 講客電臺節目組 2022-06-06:下午15點新聞

2022-06-06:下午15點新聞

接見斯洛伐克訪問團 蘇貞昌批評中國阻擋台灣加入WHA
行政院長蘇貞昌今晡日接見斯洛伐克國會、摎布拉提斯拉瓦省聯合訪問團該下講,中國用政治問題阻擋台灣加入WHA,其實都係無道理个,訪問團來台灣做得見證,中國所講个「照顧台灣人康健」个講法都係打冇嘴。蘇貞昌講,斯洛伐克經濟部次長也毋驚中國打壓,坐行政專機直接飛到台灣來,針對經濟貿易各方面簽署重要協議;感謝斯洛伐克支持台灣參加世界衛生大會(WHA)還過各種重要國際場合。斯洛伐克國會副議長勞倫契克(Milan Laurencik)表示,台灣係斯洛伐克重要經濟夥伴,遠比共產个中國還較重要,斯洛伐克關注中共擴張主義,相信俄羅斯入侵烏克蘭該時,對台灣有相像意圖个國家,應該看看全球民主陣營對俄羅斯採取哪兜反應;斯洛伐克有義務摎民主陣營企共下,為人民帶來最大个幸福。

台中發放外送員逐儕2門快篩試劑 有3萬1000儕受惠
台中市政府今晡日起勢、針對外送員,逐儕發送2門快篩試劑,推算有3萬1000儕外送員受惠。台中市長盧秀燕表示,因為疫情,盡多鄉親日常生活必須依賴外送服務,透過發放快篩試劑,關懷外送員康健。勞工局表示,戶籍在台中个外送員逐儕2門快篩,發放時間係今晡日起勢到6月初10,上晝8點到下晝5點,憑身分證摎外送人員證明,到就業服務站、抑係外送相關工會領取,領取作業採取電子掃描身分證,利便又當遽。

台北市中小學恢復實體課程 2.7%个學生仔請防疫假
因應COVID-19疫情,台北市高中、國中、國小還過幼兒園在5月23起勢實施遠距教學,毋過今晡日恢復實體課程,國中三年生摎高中三年生个學生仔、繼續遠距教學到畢業典禮。

教育局統計,一共有9473儕請防疫假,約佔學生仔總人數个2.7%。有校長認為,請假人數少毋係因為注好預防射斯放心咧,係因為家長摎學生仔「佇毋著咧」,無法度繼續關在屋下肚。

教育局指出,台北市已經在6月初3完成兒童預防射校園注射,一共摎7萬4062儕5歲到11歲个細孲仔在學校肚集中注射,注射率51.68%。假使包含透過預防射預約平台、抑係醫院特別門診注射个5歲到11歲細孲仔,截止到昨晡日,注射率已經達着56%。